Eigandi Chevrolet Camaro bíls hefur stigið fram opinberlega og segir að eftir að nafn hans og bifreið hafa verið nefnd á samfélagsmiðlum í tengslum við meint ofbeldisatvik sem á að hafa átt sér stað á Bíladögum á Akureyri vilji hann hreinsa nafn sitt. Hann hafnar því alfarið að hafa átt nokkra aðild að málinu og segir ásakanir sem beinst hafi að sér vera ósannar.
Umræðan hófst eftir að móðir 17 ára drengs birti færslu á Facebook þar sem hún segir son sinn hafa orðið fyrir hrottalegri hópárás í miðbæ Akureyrar aðfaranótt föstudags á meðan Bíladagar stóðu yfir.
Í færslu sinni segir móðirin að hún hafi ákveðið að bíða með að tjá sig opinberlega um málið í von um að reiðin myndi renna af sér. Hún segist hins vegar hafa ákveðið að segja frá eftir að hafa séð frétt af 17 ára dreng sem var barinn til bana í Frakklandi.
Segir son sinn hafa verið sleginn niður eftir að bíll ók á fót hans
Samkvæmt frásögn móðurinnar voru sonur hennar og vinir hans að skoða bíla í miðbæ Akureyrar um miðnætti þegar tveir bílar komu akandi að þeim.
Hún segir annan bílinn hafa ekið á rist sonar síns. Við það hafi hann, samkvæmt hennar lýsingu, slegið í bílinn af sársauka.
Að hennar sögn hafi fimm menn komið út úr bílnum og aðrir fimm úr hinum bílnum og ráðist á son hennar. Hún segir hópinn hafa sparkað í hann, hrint honum í jörðina og haldið áfram að sparka í höfuð hans og búk.
Móðirin segir jafnframt að fleiri menn hafi komið út af kebabstað í nágrenninu og tekið þátt í árásinni.
Hún segir að einn af vinum sonar hennar hafi einnig orðið fyrir árás.
Samkvæmt frásögn hennar missti sonurinn meðvitund meðan árásin stóð yfir.
„Ég þakka guði fyrir að þetta var stoppað því hann var rænulaus og þeir héldu áfram að sparka í hann,“ skrifar hún.
Segir lögreglu hafa flutt hann á bráðamóttöku
Móðirin segir lögreglu hafa komið á vettvang og flutt son sinn á bráðamóttöku.
Að hennar sögn fór hann þar í umfangsmiklar rannsóknir en reyndist sem betur fer ekki vera með beinbrot eða aðra alvarlega áverka.
Hún segir hann þó hafa verið mjög marinn, auman og eðlilega reiðan eftir atvikið.
Í lok færslunnar gagnrýnir hún stjórnvöld harðlega og lýsir miklum áhyggjum af þróun mála í samfélaginu.
Segist hafa orðið fyrir ásökunum
Í kjölfar umræðunnar birti eigandi Chevrolet Camaro bifreiðar færslu í Facebook hópnum Fávitar í umferðinni þar sem hann segist hafa orðið fyrir miklu aðkasti, hatri og ítrekuðum ásökunum undanfarna daga.
Hann staðfestir að hann eigi svokallaðan McQueen Camaro bíl sem hafi verið á Bíladögum en segir það rangt að hann hafi átt nokkra aðkomu að atvikinu.
„Ég er eigandi McQueen Camaro-bílsins og vil taka það skýrt fram að ég átti engan þátt í því sem gerðist á Akureyri,“ skrifar hann.
Hann segir tilgang sinn með ferðinni til Akureyrar hafa verið að taka þátt í bílasýningunni og njóta Bíladaga eins og fjölmargir aðrir bílaáhugamenn.
Segist hafa verið inni á kebabstaðnum
Í færslu sinni segir hann að þegar umrætt atvik hafi átt sér stað hafi hann verið inni á kebabstað að borða.
„Bíllinn minn var vissulega lagður fyrir utan, en það þýðir alls ekki að ég hafi tekið þátt í slagsmálum eða öðru veseni. Að bíllinn minn hafi verið á svæðinu er ekki sönnun fyrir því að ég hafi komið að málinu á nokkurn hátt.“
Hann segir jafnframt að hann sé ekki manneskja sem sækist eftir slagsmálum eða átökum og að honum þyki miður að sjá fólk draga ályktanir án þess að hafa staðreyndir eða sannanir fyrir þeim.
Hafnar fleiri sögusögnum
Í yfirlýsingunni vísar hann einnig á bug öðrum fullyrðingum sem hafi gengið á samfélagsmiðlum.
Þar nefnir hann meðal annars athugasemd þar sem því hafi verið haldið fram að hann hefði þanið bíl sinn til að vekja athygli ungra krakka.
Hann segir slíkar fullyrðingar eiga sér enga stoð í raunveruleikanum.
„Ég er aðeins að reyna að koma sannleikanum á framfæri og hreinsa mitt nafn. Ef einhver heldur því fram að ég hafi tekið þátt í þessu atviki, þá bið ég viðkomandi vinsamlegast að leggja fram raunverulegar sannanir. Ég veit sjálfur nákvæmlega hvar ég var og að ég átti engan þátt í þessu.“
Að lokum hvetur hann fólk til að sýna ábyrgð áður en það dæmir aðra eða dreifir ásökunum sem ekki séu studdar gögnum.
Lögregla hefur ekki tjáð sig
Lögregla hefur ekki tjáð sig opinberlega um málið og því liggur ekki fyrir opinber staðfesting á þeirri atburðarás sem lýst er í Facebook færslu móðurinnar.
Nútíminn leitaði einnig eftir frekari upplýsingum frá móður drengsins. Svar hafði ekki borist þegar fréttin var birt.
