Skiptar skoðanir um stækkun friðlands: „Við förum bara beint út í sjó og ég hef ekki séð að við séum að trufla neinn þar“

Jóhann Páll Jóhannsson, umhverfis-, orku- og loftslags­ráðherra staðfesti stækkun friðlands við Gróttu í dag. Við það verður Seltjörnin hluti af friðlýsta svæðinu.

„Hér er fjölskrúðugt fuglalíf og mikilvægt vistkerfi sem þarf að vernda. Og það þarf að gæta að ákveðnu jafnvægi milli þessara verndarsjónarmiða og svo útivistarinnar sem er gríðarlega mikilvæg og auðvitað mörgum sem þykir vænt um þetta svæði,“ segir Jóhann Páll.

Skiptar skoðanir hafa verið meðal íbúa á Seltjarnarnesi um stækkun friðlandsins. Áður var friðlýst í kringum Gróttu en nú bætist við svæðið um Seltjörn sem liggur að Nesvellinum. Sumir hafa beðið lengi, einn af þeim er Stefán Bergmann, íbúi á Seltjarnarnesi.

„Þetta er auglýstur ferðamannastaður í raun og veru og það þarf að koma skikki á ýmsa hluti. Það þarf að hugsa þetta út frá fuglalífinu, að gleyma ekki að gefa því svigrúm.“

Bannað að sigla vindknúnum sjóförum á varptíma

Seltjörn hefur verið mikið notuð í siglingaíþróttum. Með friðlýsingunni er bannað að sigla vindknúnum sjóförum svo sem sjódrekum og seglbrettum á varptíma frá 1. maí til 31. júlí. Staðurinn er einstakur til slíkra siglinga vegna vindstrengs sem kemur úr Hvalfirði og iðkendur vilja fá að sigla þar áfram og ekki vera settir í flokk með vélknúnum tækjum sem gefa frá sér hávaða.

Geir Sverrisson hefur siglt sjódreka um árabil og segir íþróttina stundaða í friðsemd við dýr og náttúru. Ekki hafi verið hlustað á sjónarmið þeirra sem iðka íþróttina.

„Við höfum hreinlega bara kallað eftir því að þetta verði skoðað og það hefur bara hreinlega ekki verið gert, allavegana hefur aldrei neinn mætt þegar við erum að, heldur er bara vitnað í rannsóknir utan úr heimi.“

Geir segir hafa verið talað um að ágengar sjóíþróttir yrðu ekki leyfðar.

Lítur þú ekki á þína íþrótt sem ágenga?

„Við förum bara beint út í sjó og ég hef ekki séð að við séum að trufla neinn þar.“

Jóhann Páll segir takmarkanir settar af gildri ástæðu og að þær hafi verið yfirfarnar af Náttúrufræðistofnun.

„Þetta er eitt af því sem ég lét einmitt skoða sérstaklega og rannsaka eftir að athugasemdir bárust. Þá var það metið hvort vægari leiðir væru færar til að ná fram sömu markmiðum og verja þessa sömu verndarhagsmuni. Niðurstaðan er þessi.“