Á grundvelli upplýsingalaga er Matvælastofnun skylt að afhenda eftirlitsskýrslur sínar með veiðum Hvals hf. á langreyðum. Eftir að stofnuninni bárust ábendingar um að þær fælu í sér nákvæm hnit veiðanna í morgun breytti MAST verklagi sínu.
„Við brugðumst strax við og höfum breytt verklagi þannig að nákvæm staðsetning langreyðanna er ekki lengur skráð í okkar eftirliti,“ segir Hrönn Ólína Jörundsdóttir, forstjóri MAST.
Segir öryggi sjómanna ógnað
Kristján Loftsson, forstjóri Hvals hf., skrifaði í pósti til Hrannar sem sendur var á fjölmiðla í dag að Hvalur hefði rökstuddan grun um að upplýsingar um staðsetningu veiðanna hefðu borist Bandero, skipi Paul Watson-samtakanna.
„Ekki þarf að fjölyrða um að slíkar upplýsingar ógna öryggi sjómanna Hvals hf,“ skrifaði hann og sagði fyrirtækið hafa stefnt skipum sínum á minna gjöful veiðisvæði vegna þessa „með tilheyrandi tjóni á viðskiptahagsmunum.“
Bandero hefur leitað að hvalveiðiskipunum tveimur til að stöðva veiðarnar en ekki haft erindi sem erfiði. Ásgeir Erlendsson, upplýsingafulltrúi Landhelgisgæslunnar, segir að skipið hafi ekki komist í grennd við Hval 8 og Hval 9.
Þeir sem taki við gögnum beri ábyrgð
Hrönn segir að Matvælastofnun vilji ekki verða þess valdandi að upplýsingar sem komi frá stofnuninni ógni öryggi sjómanna.
Eftir að upplýsingarnar fara frá stofnuninni verða þó þeir sem taka við þeim að bera ábyrgð á notkun þeirra.
„Ef þær eru notaðar í hættulegum, annarlegum eða mögulega glæpsamlegum tilgangi þá verða þeir aðilar að bera ábyrgð á því.“
Kristján óskaði eftir skýringum á því af hverju Hval hf. var ekki gefinn kostur á að tjá sig um upplýsingabeiðnir um eftirlitsskýrslurnar. Hrönn segir hins vegar að stofnuninni beri ekki skylda til að óska eftir áliti eftirlitsþega varðandi þær.
„Þarna vísum við bara í upplýsingalög. Okkur er skylt að afhenda öll gögn sem við söfnum nema þau varði persónuvernd.“
