Kristján Loftsson, forstjóri og eigandi Hvals hf., óskar eftir því að Matvælastofnun upplýsi um það hverjum hún hafi afhent eftirlitsskýrslur sínar úr skipum fyrirtækisins.
„Á eftirlitsskýrslunum getur að líta, eins og þér er fullkunnugt, nákvæma staðsetningu (hnit) veiddra langreyða. Út frá því er hægt að draga ályktanir um hvar skip Hvals hf. halda sig við veiðar,“ skrifar Kristján í tölvupósti til Hrannar Ólínu Jörundsdóttur, forstjóra MAST.
Pósturinn var einnig sendur á fjölmiðla.
Kristján segir að Hvalur hf. hafi rökstuddan grun um að þessar upplýsingar hafi borist skipinu Bandero. „Ekki þarf að fjölyrða um að slíkar upplýsingar ógna öryggi sjómanna Hvals hf,“ skrifar hann.
Stefndu skipunum annað
Fyrirtækið hefði krafist þess að upplýsingar yrðu afmáðar „í ljósi yfirlýsinga skipverja á Bandero og forsvarsmanna útgerðarinnar.“
„Framangreint hefur jafnframt leitt til þess að Hvalur hf. hefur stefnt skipum sínum annað þar sem veiðar eru ekki eins gjöfular eins og er með tilheyrandi tjóni á viðskiptahagsmunum fyrirtækisins.“
Fréttastofa hefur fengið þó nokkrar eftirlitsskýrslur MAST úr Hval 8 og Hval 9 afhentar. Í sumum þeirra má sjá nákvæm hnit þar sem langreyðarnar voru skotnar. Fréttastofa hefur einnig vitneskju um að náttúruverndarsamtök hafi undir höndum skýrslur sem sýna nákvæm hnit veiða á sumum langreyðum.
Bandero, skip Paul Watson-samtakanna, sigldi inn í íslenska efnahagslögsögu nýlega til að stöðva veiðar Hvals með öllum tiltækum ráðum. Skipið hefur leitað að hvalveiðiskipunum tveimur en ekki haft erindi sem erfiði.
Fréttin hefur verið uppfærð.
