Eftir marga mánuði af reglulegu rafmagnsleysi á Kúbu eru olíubirgðir á þrotum, samkvæmt orku- og námumálaráðherra landsins. Líkleg afleiðing olíuskortsins sé að rafmagnsleysi sem nái yfir allt landið verði tíðara, víðtækara og vari í lengri tíma.
New York Times greinir frá.
Á vef Times segir að orkukreppan hafi varað í um tvö ár, orkuinnviðir séu ekki nægilega góðir og minni birgðir berist frá Venesúela. Kúbverjar vinna olíu upp að vissu magni, en innlend framleiðsla á eldsneyti getur aðeins uppfyllt um 40% af þörf landsins.
Vicente de la O Levy, orku- og námumálaráðherra Kúbu, segir orkuver liggja niðri og birgðir búnar.
„Við eigum bókstaflega ekkert eldsneyti, bókstaflega enga dísilolíu,“ segir de la O Levy í viðtali við Cuba Debate. „Það var rafmagnslaust í Havana í dag í meira en 20, 22 klukkustundir.“
Þegar rafmagn komi aftur á geti það varað í skamman tíma, jafnvel aðeins eina og hálfa klukkustund.
Samningaviðræður á laum
Innflutningur á olíu til Kúbu frá Venesúela stöðvaðist alveg í janúar, eftir að Bandaríkin réðust inn í Venesúela og handtóku Nicolás Maduro, forseta þess, og tóku yfir olíuiðnað ríkisins. Bandaríkjastjórn átti síðan eftir að setja herkví um landið og banna olíuflutning til þess.
Á vef Times segir að yfirvöld á Kúbu og í Bandaríkjunum hafi undanfarnar vikur átt í samningaviðræðum á laum. Markmið Kúbverja sé að herkvínni verði aflétt. Markmið Bandaríkjanna sé að binda enda á hald kúbversku ríkisstjórnarinnar á efnahag landsins og pólitíska kúgun.
Yfirvöld á Kúbu greindu frá því á X í gær að John Ratcliffe, framkvæmdastjóri CIA, hefði heimsótt landið. „Byltingarstjórnin samþykkti beiðni frá bandarískum stjórnvöldum um að taka á móti sendinefnd í Havana, undir forystu Johns Ratcliffe, framkvæmdastjóra CIA,“ segir í færslunni, sem embætti forseta Kúbu birti.
Elda með kolum
Orkukreppan veldur því að langt rafmagnsleysi er í fjölda borga á Kúbu orðið daglegt brauð. Þetta hefur mikil áhrif á líf fólks í landinu. Það hefur reitt sig á kol og timbur til eldunar þegar rafmagnslaust verður. Sumir hafa tekið upp á því að sofa á þaki sínu á nóttinni til að komast undan hitanum.
Kúbverjar hafa margir haldið út á götur þar sem þeir mótmæla ástandinu harðlega.
Í byrjun apríl veittu Bandaríkjamenn undanþágu fyrir rússneskt olíuskip til að flytja olíu til Kúbu. Hún kom með 100.000 tonn af olíu. Síðan þá hefur engin olía borist til landsins og birgðirnar eru búnar.
Orku- og námumálaráðherrann segir þess að vænta að rafmagnsleysið eigi eftir að versna á næstu vikum þegar hitastig fer hækkandi með tilheyrandi álagi á rafmagnskerfi landsins.
Birgðirnar á þrotum
Miguel Díaz-Canel, forseti Kúbu, skrifar um orkukreppuna á X. Hann segir ástandið spennuþrungið.
„Í dag er spáð skorti upp á meira en 2.000 MW á hámarksálagi. Aðeins ein ástæða er fyrir þessari versnandi stöðu: orkuherkví Bandaríkjamanna og þjóðarmorðstilburðir þeirra,“ skrifar Díaz-Canel.
Kúbverjar hafa aðeins fengið tvær sendingar af olíu síðan í desember í fyrra. Orku- og námumálaráðherrann segir ekki koma til greina að skipta yfir í sólarorku vegna ástandsins. Orkuinnviðir landsins höndli ekki spennuna sem slíkt kerfi þurfi.
Bandaríkjastjórn hefur gert lítið úr þætti sínum í kreppu Kúbverja.
„Ástæðan fyrir því að þeir eiga enga olíu er að þeir eiga enga peninga til að kaupa olíu,“ sagði Marco Rubio, utanríkisráðherra Bandaríkjanna, í mars. „Vandamálið þeirra er að þegar fólk selur þér olíu þá ætlast það til þess að fá greitt fyrir hana.“
Kúbverjar framleiða um 40.000 olíutunnur á dag en dagleg þörf í landinu er 100.000 tunnur. Landið hefur reitt sig á olíuinnflutning frá Mexíkó og Venesúela.
„Sú litla orka sem við erum að framleiða fer til sjúkrahúsa, svæða sem eru í miklum efnahagslegum forgangi og nokkurra rása sem verður að verja fyrir orkusveiflum,“ segir de la O Levy.
Jorge Piñón, sérfræðingur í kúbverskum orkumálum, spáði því að olíubirgðir landsins myndu ekki vara lengur en fram í mars. Ríkinu hefur þó tekist að láta olíuna duga lengur. Nú er ástandið orðið svo slæmt að ekki er til eldsneyti til að fylla á olíuflutningabílana, hefur Times eftir Piñón.
„Aðfangakeðjan er tóm. Þeir eru komnir þangað. Það var ennþá til smá olía hér og smá olía þar. En ekki lengur.“
