Bæjarfulltrúar í Kópavogi eru ósammála um hvort ríkið standi við samkomulag um börn með fjölþættan vanda. Tekist var á um reglugerð ríkisstjórnarinnar á bæjarráðsfundi fyrir helgi.
Jónas Már Torfason, bæjarfulltrúi Samfylkingarinnar, sakar meirihlutann og raunar bæjarstjórnir víðar um að gera flokkspólitískt upphlaup úr málinu. Ásdís Kristjánsdóttir, bæjarstjóri Kópavogs, gefur lítið fyrir þá gagnrýni.
Samkomulag ríkis og sveitarfélaga um að ríkið taki yfir mál barna með fjölþættan vanda var undirritað í mars í fyrra. Setja á þrjá milljarða króna í málaflokkinn. 1. júní þessa árs birti Inga Sæland, barna- og menntamálaráðherra, nýja reglugerð sem er ætlað að skýra til hvaða hóps samkomulagið nær.
Samband íslenskra sveitarfélaga (SÍS) og Samtök sveitarfélaga á höfuðborgarsvæðinu (SSH) hafa gagnrýnt reglugerðina og að ríkið sé að þrengja að skilgreiningu á þeim hópi sem samkomulagið nái til.
Bæjarstjóri segir ríkið brjóta samkomulagið
Ásdís segir ríkið vera að ganga á bak orða sinna.
„Það er auðvitað verulegt áhyggjuefni að ríkið sé nú einhliða í raun að þrengja skilgreiningu á því hvaða börn falla þarna undir og séu í raun að breyta forsendum samkomulagsins. Að mínu mati er ljóst að ríkið ætlar einfaldlega að láta kostnaðinn að hluta falla til á sveitarfélögin,“ segir Ásdís.
Málið sé mikið áhyggjuefni.
„Sérstaklega er þetta bagalegt í ljósi þess að stjórnvöld voru ekki að spara stóru orðin þegar þetta samkomulag var gert á sínum tíma og með hástemmdar yfirlýsingar um að þau væru loksins að taka yfir þennan málaflokk. Nú þegar á reynir þá virðist vera eins og ríkið ætli að bakka og ég get ekki betur séð en að þau séu beinlínis að brjóta á því samkomulagi sem var gert.“
Sakar meirihlutann um að gera málið pólitískt
Jónas Már segir ágreining um hvað felst í samkomulagi ríkisins og sveitarfélaganna.
„Ég fæ það svolítið á tilfinninguna að þetta sé farið að vera einhver pólitík. Maður skynjar það á Sjálfstæðismönnum að þeir vilja meiri hörku í pólitíkina eftir þessar sveitarstjórnarkosningar og ég held að þetta sé mál úr þeim ranni í rauninni,“ segir Jónas Már.
Ríkið hafi staðið við sitt í fjármögnun málaflokksins. Fram undan sé að skilgreina hverjir það séu sem fái þessa þjónustu frá ríkinu og hverjir fái hana áfram frá sveitarfélögum. Það sé tilgangur reglugerðarinnar.
Í bókun sem Jónas Már lagði fram á fundi bæjarráðs bendir hann á að stjórn SSH sé alfarið skipuð Sjálfstæðismönnum.
„Þetta eru alla jafna framkvæmdastjórar sveitarfélaganna sem skipa þessa stjórn, bæjarstjórarnir. Eftir síðustu sveitarstjórnarkosningar eru það allt Sjálfstæðismenn í grunninn. Þannig er nú bara pólitíkin, maður kemur fólki í stöður og reynir að beita áhrifum.“
Jónas Már stórefar að stjórnir sveitarfélaganna hefðu verið að álykta um málið á tíma síðustu ríkisstjórnar. Þá hafi ekkert gerst í málaflokknum.
„Núverandi ríkisstjórn hefur þó allavega lagt þrjá milljarða í málaflokkinn og það var nú því sem var lofað í þessu samkomulagi. Ég sýni því alveg skilning að þetta er samtal og þetta er eitthvað sem þarf að fínpússa en það er gjörsamlega ótímabært að fara í svona harðortar ályktanir og ég held að það sé ekki gagnlegt innlegg inn í umræðuna,“ segir Jónas Már.
„Tek ekki þátt í svona pólitík“
„Mér finnst þessi afstaða sæta furðu, ég verð að segja það,“ segir Ásdís Kristjánsdóttir um athugasemdir Jónasar Más.
„Einkum og sér í lagi í ljósi þess að þetta er auðvitað álit stjórnar Sambands íslenskra sveitarfélaga sem er meðal annars skipuð fulltrúum hans eigin flokks. Hér er um gríðarlega hagsmuni að ræða fyrir sveitarfélagið.“
Sveitarfélögin hafi í mörg ár barist fyrir réttlátri kostnaðarskiptingu ríkis og sveitarfélaga í málaflokknum. Meirihlutinn í Kópavogi lagði fram bókun SSH um málið á bæjarráðsfundi á fimmtudag. Í henni er vísað til ályktunar SÍS.
„Við erum bæði að vísa til bókunar sem var gerð á vettvangi SSH sem og líka bókun Sambands íslenskra sveitarfélaga. Stjórn Sambands íslenskra sveitarfélaga er auðvitað skipuð fulltrúum úr öllum flokkum. Þannig að ég bara tek ekki þátt í svona pólitík.“
