Stefán Pálsson, fulltrúi í miðnefnd Samtaka hernaðarandstæðinga, segir mikilvægara en nokkru sinni fyrr að Ísland reyni að losa sig úr NATO. Aukin hernaðarumsvif hér á landi auki hættuna á að Ísland dragist inn í átök sem komi því ekki við og geri landið að skotmarki.
Viðbúnaður á Íslandi hafi aldrei snúist um að verja Ísland. Þá geti afnot Bandaríkjanna af íslensku landi auðveldað þeim að hernema Grænland.
Þetta segir hann í kjölfar yfirlýsingar Alexus Grynkewich, yfirhershöfðingja Atlantshafsbandalagsins og yfirmanns bandaríska heraflans í Evrópu, þar sem hann segir staðsetningu Íslands strategískt mikilvæga og að hagsmunir Bandaríkjanna og NATO séu að hafa herlið hér til lengri tíma.
Grynkewich og Kristrún Frostadóttir forsætisráðherra hafi rætt langtímaáætlun um fjárveitingar og nauðsynlega innviði næstu tuttugu árin.
„Herstöð er skotmark“
Stefán segir Bandaríkin fyrst og fremst rekin áfram af eiginhagsmunastefnu.
„Viðbúnaður á Íslandi hefur aldrei snúist um það að verja Ísland, heldur hefur Ísland haft hlutverki að gegna í varnar- og viðbúnaðarkeðju Bandaríkjamanna. Þannig að í rauninni auka öll umsvif hér á Íslandi bara líkurnar á að Ísland dragist inn í atburði sem tengjast okkur ekki að öðru leyti. Það á bara við sem við sögðum alltaf í kalda stríðinu. Herstöð er skotmark.“
Hvað heldurðu að Bandaríkjunum gangi til?
„Við höfum séð það að Bandaríkin hafa með mjög ákveðnum hætti sett fókusinn á Norðurslóðir – á Grænland og Ísland. Það byggist á ímynduðum eða raunverulegum hagsmunum varðandi siglingaleiðir á Norðurslóðum. Það getur ekki verið okkar markmið að ýta undir það. Ekki viljum við fara að leggja til íslenskt land til að auðvelda mönnum hernám Grænlands.“
