Kjósendur Miðflokksins skiptast í fylkingar í afstöðu sinni til þess hvort hitamet og skógaelda í Evrópu megi rekja til loftslagsbreytinga. Þetta má lesa úr niðurstöðu könnunar Maskínu fyrir Náttúruverndarsamtök Íslands.
Alls sögðust 82% svarenda telja að hitamet og skógareldar í Evrópu væru að miklu leyti vegna loftslagsbreytinga.
Þegar litið var til afstöðu til stjórnmálaflokka var meirihluti fólks á þeirri skoðun að hitamet og skógareldar í Evrópu tengdust loftslagsbreytingum, að mjög miklu eða frekar miklu leyti, sama hvaða flokk það sagðist myndu kjósa ef kosið yrði til Alþingis í dag – nema þegar litið var til þeirra sem sögðust myndu kjósa Miðflokkinn.
Yfir helmingur þeirra sagðist telja þessa atburði tengjast loftslagsbreytingum að litlu leyti.
9,8% þeirra sögðu þá tengjast loftslagsbreytingum að mjög miklu leyti og 36,5% að frekar miklu leyti. 32,4% sögðust telja þá tengjast loftslagsbreytingum að frekar litlu leyti og 21,4% að mjög litlu eða engu leyti.
Þegar litið er til flokka á Alþingi voru þeir sem myndu kjósa Samfylkinguna helst á þeirri skoðun að hitamet og skógarelda í Evrópu mætti rekja til loftslagsbreytinga. Aðeins 5,7% þeirra voru á andstæðri skoðun.
Allir svarendur sem sögðust myndu kjósa Vinstri hreyfinguna - grænt framboð sögðust telja þessa atburði tengjast loftslagsbreytingum að miklu leyti.
Könnunin var gerð af Maskínu fyrir Náttúruverndarsamtök Íslands. Svarendur eru 18 ára og eldri af öllu landinu. Svarendur voru alls 1.205.
