Spurningin sem brennur á Kópavogsbúum í dag er hvort núverandi meirihluti Sjálfstæðisflokks og Framsóknar hljóti traust til að leiða næststærsta sveitarfélag landsins áfram næstu fjögur árin. Skoðanakannanir hafa sýnt að litlu geti munað, en Samfylkingunni er spáð mun betra gengi en í kosningunum 2022 þegar flokkurinn hlaut aðeins einn bæjarfulltrúa og eins virðist Miðflokkurinn ætla að koma sterkur inn.
Fyrstu tölur upp úr kjörkassanum gefa oft góða vísbendingu um hug Kópavogsbúa og nú eru þær komnar, en talin hafa verið 10.087 atkvæði:
- Sjálfstæðisflokkur: 4552 atkvæði, eða 45,8 prósent og 6 bæjarfulltrúa
- Samfylking: 1914 atkvæði, eða 19,3 prósent og 2 bæjarfulltrúa
- Framsókn: 1075 atkvæði, eða 10,8 prósent og 1 bæjarfulltrúa
- Viðreisn: 957 atkvæði, eða 9,4 prósent og 1 bæjarfulltrúa
- Miðflokkur: 980 atkvæði, eða 9,9 prósent og 1 bæjarfulltrúa
- Vinstri græn: 285 atkvæði, eða 2,9 prósent
- Sósíalistaflokkurinn: 168 atkvæði, eða 1,7 prósent
- Auðir seðlar voru 156 en enginn seðill var ógildur.
Miðað við þessar fyrstu tölur er Sjálfstæðisflokkurinn með hreinan meirihluta og bætir töluvert við sig frá síðustu kosningum. Samfylkingin bætir líka hressilega við sig en bætir þó bara við sig einum fulltrúa.
Verði þetta niðurstaða kosninganna þá er um sögulega stund fyrir Sjálfstæðismenn að ræða en þeirra besta gengi hingað til var árið 2006 þegar flokkurinn hlaut 44,27 prósent atkvæða sem þó dugaði ekki fyrir hreinum meirihluta.
Niðurstöður sveitarstjórnarkosninganna árið 2022 voru eftirfarandi:
- Sjálfstæðisflokkur: 33,32% og fjórir bæjarfulltrúar
- Framsókn: 15,16% og tveir bæjarfulltrúar
- Vinir Kópavogs: 15,28% og tveir bæjarfulltrúar (buðu ekki fram í ár)
- Viðreisn: 10,67% og einn bæjarfulltrúi
- Píratar : 9,51% og einn bæjarfulltrúi (buðu ekki fram í ár)
- Samfylkingin: 8,18% og einn bæjarfulltrúi
- Vinstri grænir: 5,27% og enginn bæjarfulltrúi
- Miðflokkur og óháðir: 2,62% og enginn bæjarfulltrúi
