Aðalmeðferð í Reykholtsmálinu hélt áfram í Héraðsdómi Suðurlands í dag. Hún hófst í gær þegar spilaðar voru upptökur úr síma Andra Más Mortensens Birgissonar. Hann er einn af sex sem eru ákærð fyrir að svipta mann frelsi sínu í Reykholti í apríl 2024, kúga af honum fé og beita margþættu ofbeldi.
Upptökurnar voru alls um þrjár klukkustundir og ná yfir um vikutímabil.
Mennirnir tveir sem taldir eru hafa farið með Andra Má í Reykholt á heimili brotaþola gáfu skýrslu fyrir dómi í morgun. Þeim er gefið að sök að hafa svipt manninn frelsi sínu og beitt hann ofbeldi.
Andri sagði á upptökunum sem spilaðar voru í gær að mennirnir hafi orðið stressaðir og skilið hann eftir einan með brotaþola.
Ætlaði bara að lána Andra bíl en ákvað svo að fara með
Sá sem var fyrri til að gefa skýrslu í dag er meðal annars gefið að sök að hafa ráðist að brotaþola með höggum og spörkum. Hann lýsti því fyrir dómi að hann hafi upphaflega bara ætlað að lána Andra bíl umrætt kvöld.
Þegar hann hafi komið á staðinn hafi Andri og unnusta hans hins vegar lýst því að brotaþoli skuldaði leigu og hefði verið ógnandi við fjölskyldu hennar. Hann hafi svo ákveðið að fara með Andra og hinum manninum til brotaþola því hann vildi vera viss um að hann fengi bílinn aftur þarna um nóttina.
Hlutirnir ekki eins og honum hefði verið sagt
Maðurinn lýsir atburðarrásinni þannig að hann hafi fljótt áttað sig á því að brotaþoli væri ekki á neinn hátt eins og parið hafði lýst honum – og augljóslega ekki ógnandi. Hann hafi einnig áttað sig á því að þetta snerist um eitthvað allt annað en leiguskuld út frá þeim gögnum Andri hafi verið að biðja um.
Hann segist sjálfur ekki hafa beitt manninn neinu ofbeldi og strax séð að hlutirnir hafi farið úr böndunum.
Andri hafi verið ógnandi við brotaþola en hann hafi þó ekki séð hann beita manninn ofbeldi. Hins vegar hafi hann heyrt Andra vera ógnandi og séð áverka á brotaþola. Hann hafi viljað fara og það hafi hinn maðurinn líka.
Þeir hafi gert það eftir að maðurinn slapp næstum frá þeim.
Ekki „stóri maðurinn“ sem brotaþoli lýsti
Brotaþoli lýsti hjá lögreglu að mennirnir hefðu verið þrír; Andri og tveir aðrir. Annar þeirra hefði verið „stór maður“. Maðurinn er um 190 cm á hæð.
Brotaþoli sagði þennan stóra mann hafa ruðst fyrst inn og kýlt sig og slegið. Sá hefði einnig veist að honum með höggum og spörkum.
Sakborningurinn segist ekki kannast við það og ekki vita hvern brotaþoli ætti við.
Ekki hann sem talaði um hníf, barnaníðsefni og sjálfsmorð á Signal
Þá voru borin undir hann skilaboð á síma Andra af forritinu Signal. Þar hafði maður með sama nafn og maðurinn ber skrifað; „Fæ gamla Range úr viðgerð seinna í dag, betra að fara á honum.“
Hann sé vinur Andra og ætli að taka með sér beittan teppahníf og hanska, koma honum fyrir í baðkari og skera af honum fötin „til að brjóta hann sem fyrst.“
Þá ætli hann að koma fyrir barnaníðsefni inn á tölvu viðkomandi og hringja á lögregluna svo að sá hafi ekki annan valkost en að gera það sem þeir komu fyrir. Annað hvort það eða að „sjálfsmorða hann„ eins og það er orðað.
Í hótelrekstri en kannaðist ekki við skilaboð um hótelherbergi
Maðurinn sagðist ekki kannast við þessi skilaboð, né önnur sem fundust á síma Andra. Hann notist bara við símtöl og Messenger, ekki Signal, sem er dulkóðað samskiptaforrit.
Í öðrum skilaboðum frá sama aðila er rætt um verð á hótelherbergi, sem maðurinn sagðist ekki heldur kannast við. Dómarinn spurði hann hvort hann hafi ekki verið í hótelrekstri á þessum tíma, sem hann játaði en vissi ekki til þess að hann hafi sent þessi skilaboð.
Hann ítrekaði að hafa ekki beitt neinu ofbeldi þetta kvöld og að hann myndi aldrei hafa það í sér eftir að hafa áttað sig á að brotaþoli væri ekki ógnandi eða ofbeldismaður – og eldri en hann hefði haldið.
Þvertekur fyrir að hafa farið á heimili brotaþola
Seinni maðurinn gaf talsvert styttri skýrslu fyrir dómi. Hann sagðist hreinlega ekki hafa verið með í þessari ferð Andra og hins mannsins. Hann hafi dvalið heima hjá Andra næturnar á undan og farið af stað með þeim í bílnum þarna á föstudagskvöldinu. Fjórir menn hafi verið í bílnum að honum meðtöldum.
Honum hafi þó fljótt hætt að lítast á blikuna og ákveðið að fara út úr bílnum í Mosfellsbæ og hinir haldið áfram.
Hans frásögn rímar ekki við frásögn Andra og hins mannsins sem segja báðir að þeir hafi verið þrír sem fóru af stað í bílnum, og á heimili brotaþola. Það kom aldrei fram hver fjórði maðurinn á að hafa verið en maðurinn hélt því statt og stöðugt fram að hann hafi ekki farið með þeim þetta kvöld.
Hann hafi reddað sér fari til baka, og endað hjá fjölskyldu sinni í Keflavík. Það passar hins vegar við það að fyrri maðurinn sagðist hafa skutlað honum á Suðurnes eftir að þeir forðuðu sér af heimili brotaþola þarna um nóttina.
Þriðji maðurinn sem gaf skýrslu fyrir dómi í dag er tengdafaðir Andra Más. Greint verður frá skýrslu hans í annarri grein.
