Íbúar Krímskaga, sem Rússar hertóku 2014, eru án rafmagns löngum stundum. Ekkert eldsneyti er að fá fyrir almenning.
Úkraínuher lýsti því yfir í dag að hafa gert árásir á rafmagnsinnviði á 16 stöðum á Krímskaga síðustu tvo sólarhringa. Æ oftar er rafmagnslaust. Á kvöldin notar fólk ljós úr símum sínum því oft er slökkt á ljósastaurum.
„Okkur var lofað að rafmagnið yrði aðeins tekið af í þrjá tíma og svo sett aftur á í þrjá tíma, en raunin er sú að rafmagnsleysið er mjög tilviljanakennt,“ segir starfsmaður á kaffihúsi í Feodosia á Krímskaga.
Rússlandsher hefur gert harðar árásir í Úkraínu frá því hann hóf allsherjarinnrás 2022. Úkraínumenn hafa því þurft að vera án rafmagns og hita yfir veturinn. Úkraínumenn beita þeirri taktík núna að reyna að einangra Krímskaga með árásum á brýr, vegi og orkuinnviði.
„Það er auðvitað stefnan, að einangra okkur svo þetta verði eins og að búa á eyju,“ sagði íbúi á Krímskaga við franska fréttamenn á dögunum.
Krímskagi hefur verið vinsæll áfangastaður ferðamanna yfir sumarið en nú er öldin önnur.
„Það eru ekki margir hérna og bókanir eru fáar. Hvað eigum við að gera? Fólk er hrætt og afbókar,“ segir starfsmaður í ferðaþjónustu í Feodosia.
Vegna hertra árása Úkraínumanna á olíuinnviði í Rússlandi er víða skortur á eldsneyti. Á Krímskaga bætist svo við að erfitt er að flytja þangað olíu og bensín vegna árása Úkraínumanna á vegi og brýr. Langar raðir voru á síðustu bensínstöðinni í Rússlandi áður en ekið er til Krímskaga þegar franskir fréttamenn voru þar á dögunum.
Staðan er önnur á bensínstöðvum á Krímskaga, þar er ekkert eldsneyti að fá. „Það voru sérstakir skömmtunarseðlar en ekki fyrir alla svo fólk þurfti að bíða klukkutímum saman. Núna er ekkert eldsneyti eftir,“ segir íbúi á Krímskaga. Síðustu daga hefur verið hætt að selja almenningi þar eldsneyti vegna skortsins.
