Tæknirisinn Meta gerði börn vísvitandi háð samfélagsmiðlunum Facebook og Instagram, að sögn fulltrúa um 30 ríkja sem höfðuðu mál gegn fyrirtækinu. Réttarhöld í málinu hófust í gær.
Málið er rekið fyrir hönd 29 ríkja, meðal annars Kaliforníu og New York, sem segja Meta hafa brotið fjölda alríkis- og ríkislaga um friðhelgi barna. Þetta er stærsta skaðabótamál á sviði neytendamála í sögu Bandaríkjanna.
Hagnaður frekari en öryggi notenda
Kviðdómur hlýddi á opnunarræður fulltrúa ríkjanna sem krefja fyrirtækið um milljarða bandaríkjadala í skaðabækur og vilja róttækar breytingar á samfélagsmiðlunum, og fulltrúa Meta, sem hafnar ásökununum.
Megan O'Neill, aðstoðardómsmálaráðherra Kaliforníu, sakaði Meta um að hafa vitað af milljónum barna á aldrinum 11 til 12 ára á Instagram en gert lítið til að koma í veg fyrir að þau hefðu aðgang að samfélagsmiðlinum.
Hún sagði Meta hafa vitað að samfélagsmiðlar þeirra skaði geðheilsu unglinga en að tæknirisinn hafi sett hagnað ítrekað fram yfir heilsu barna. Á sama tíma hafi fyrirtækið afvegaleitt almenning um öryggi samfélagsmiðlanna.
Hægt væri að draga viðskiptamódel samfélagsmiðlanna saman í nokkra puntka: „ná í notendur, halda þeim eins lengi og mögulegt er, nýta gögn um þá, fela sannleikann frá almenningi þegar gefnar eru út opinberar upplýsingar.“
Réttarhöldin standa yfir í sex til átta vikur og O'Neill sagði að kviðdómi yrði það ljóst smám saman að það sem Meta hafi sagt opinberlega og það sem rannsóknir innan fyrirtækisins hafi sýnt séu tveir ólíkir hlutir.
„Meta sagði að það setji öryggi ofar hagnaði en raunveruleikinn er sá að aftur og aftur, þegar kom að ákvörðun var hagnaður settur í forgang.“
Neitaði að samfélagsmiðlarnir væru ávanabindandi
Paul Schmidt, lögfræðingur Meta, sagði fíkn í samfélagsmiðla ekki til. Hann hrakti eða gerði lítið úr ýmsum gögnum sem O'Neill vitnaði, eins og til dæmis fjölda barna á aldrinum 11 til 12 ára sem voru með aðgang að Instagram.
Schmidt sagði að Meta hefði fundið um 100 þúsund slíka aðganga á samfélagsmiðlinum, ekki milljónir, eins og O'Neill sagði.
O'Neill vitnaði í skýrslu innan fyrirtækisins sem hún sagði sýna að einum af hverjum fimm unglingum á Instagram segði að samfélagsmiðillinn láti þeim líða illa.
„Það hljómar ansi illa,“ sagði Schmidt. „En hvað annað stendur í skýrslunni? Að 41% unglinga sögðu að þetta olli þeim vanlíðan og 41% sögðu að þetta hefði engin áhrif.“
Schmidt neitaði einnig að Meta hefði ekki reynt að stöðva börn undir 13 ára aldri að nota samfélagsmiðlana.
Hann sagði persónuverndarlög sem Meta væri sakað um að brjóta hefðu einmitt komið í veg fyrir að fyrirtækið gæti vistað og notað gögn sem það þurfti til að rekja notendur undir lögaldri á skilvirkan hátt.
Hann benti einnig á að engar rannsóknir hafi verið gerðar sem sýndu fram á að fólk fengi samfélagsmiðlafíkn.
„Það er enginn vafi á því að Meta hefur viðurkennt að fólk eigi í erfiðleikum með notkun sína á samfélagsmiðlum og hefur því fundið upp tæki og tól til að reyna að takast á við það.“
